2008 04 LO QUARTON

Lou cartou !

Sabé dé qu’es en cartou ? Iaro, las femnos s’en siervoun pré bouta dé flours. Mé, noustous anciens n’en fasiont en aoutré usadgé, quos en outis quo souvent fa susa lou moundé dé la térro. Quo s’éro n’a mésuro pri gro dinc nousta régiou, eh, ténio à po prés vint itrés. Lous pu veils éroun en boués, peï, après qu’éro dé couiré, quaouqué cop dé feuillo mé,, quo, n’en fasiont surtout lous farrats, après la Guerro, eh, en darrié temps éroun en férrè, en tolo pu léou. Di temps de noustous Grond-Pairés las mésuros éroun pas las mêmos pertout, quos Napoléon, après la révolutiou, qué s’isaillé dé ou bouta débout. Pu louon dinc lou temps, nousté bouon « Charlemagne » aillo voudu ou fa, « las mêmos mésuros dinc tout lou païs », mé, qui paouré hommé, éro pas ton encagna qué qui qué nous gouverno aneil, eh agué pas lésé, mourigué davos, faï qué las mêsuros toumbéoun à l’aïgo. D’aoutrés maï issalléroun mé, quo sé fé jamaï. Tchagué espita la loi dé dés hué cent trento set pré ou véiré arriba. Eh quo sé bouté en placo tout daïsé, quéro counplica.

Aneil, avent mé tchangea dé mounédo eh i arriben pas, immadgina, davos i aillo dé mêsuros pri gro, pri vi, prous pétassés, pré las loundjous, prous tchons... enfin, pré tout ! eh quo tchangeavo d’en caïré a laoutré eh lou moundé sabion mêmés pas lédgi. Alors, quos bé sur qua quo bouté dé temps, i o dé vias quon perdura entro nousta dgénératiou. Avé toutés ousi parla dé « iouros » (na iouro dé burré ou dé café ! fasio 489,5 grammés) eh lou « tintaou », sé pésa dous tintaous, vous tcho pas fa dé souci, quo faï mé na « ballo », quos déjo rasounablé, en bouon hommé diren (quo faï 100 kg, pas 200 !), embé en pétio régimé séré meil ! Eh quo pouo pas vous fa dé maou !

Georges Sauret

Volcan | 2008 04

Lo quarton !

Sabètz de qu’es un quarton ? Iara, las femnas se’n sièrvon pre botar de flors. Mè nostos anciens ne’n fasián un autre usatge ; quò’s un autís qu’a sovent fat susar lo monde de la tèrra. Quò zèra ’na mesura prei gran dins nosta region e teniá a pauc près vint litres. Los pus vuèlhs èron en boès, puèi, après, qu’èra de coire,quauque còp de fuèlha mè, quò, ne’n fasián surtot los farrats, après la Guèrra, e, en darrièr temps èron en fèrre, en tòla puslèu. Dei temps de nostos Grand-Paires las mesuras èron pas las mèmas pertot, quò’s Napòleòn, après larevolucion, que s’eissaièt de o botar debot. Pus lònh dins lo temps, noste bòn Charlemagne aiá vougut o far, las mèmas mesuras dins tot lo país, mè, quei paure òme èra pas tant encanhat que queique nos govèrna anuèit, e aguèt pas léser, moriguèt davans, fai que las mesuras tombèron a l’aiga. D’autres mai eissaièron mè quò se faguèt jamai. Chalguèt espaitar la loà de dètz-uèt-cent-trenta-sèt pre o veire arribar. E quò se botèt en plaça tot d’aise, qu’èra complicat.

Anuèit, avem mès chanjat de moneda e i arribem pas, imaginatz, davans i aiá de mesuras prei gran, prei vin, praus petaces, pre las lonjors, praus champs… enfin, pre tot ! e quò chanjava d’un caire a l’autre e lo monde sabián mèmes pas legir. Alòrs, quò’s ben sur qu’aquò botèt de temps, i a de viaas qu’an perdurat entrò nosta generacion. Avètz totes ausit parlat de liuras (’na liura de burre o de cafè ! fasiá 489,5 grames) e lo quintau, se pesatz dos quintaus vos chau pas far de socit, quò fai mè ‘’na bala, quò’s deja rasonable, un bòn òme direm (quò fai 100 kg, pas 200 !), embe un petiòt regime seretz mèlhs ! E quò pòt pas vos far de mau !

Georges Sauret

Volcan | 2008 04

occitan.org