1892 07 17 ANEM A LORDA

Anem a Lorda

LOU 14 JUILLÉ ET LOU 13 SEPTEMBRÉ

— Dounté vénés, Jean, l’on dirié qué siés inquié.

— Mé parlés pas, moun paouré Joousé, véni dé vés lou taillur ; l’aoutré jour oviéi prés mésuro d’en hobit per ona a Nimé eï 14 juillé, iaro pouopa mé lou faïré.

— Iéou mai mé li chaou bé ona préné mésuro, mais encaro aï bé lou tén d’eïci ei 13 sétembré.

— Ounté vouos ona lou 13 de sétembre ?

— Sasbé pas qu’oquest’on io én aoutré pélerinagé, o Lourdo ; léjissés pas doun lou journal (la Croix) lou journal dés cotouli ; aqui oouriés vi.

— Encaro vouos tourna o Lourdo, tu qué li siés ona dous co ?

— Oui li siéi esta dous co et oquest’on foro très, maï m’en répenti pas.

— Et tu déqué vas faïré a Nimé que li vas toutés lous on.

— Quos qu’o Nimé lou 14 juillé aquos bien pouli.

— Sabi coum’oquo és, li siéie sta, pouospa coumpora lou 14 juillé én dé lou pélérinagé de Lourdo, cos coumo lou nué én déï jour.

— Couonto me én paou dé qué io tont o Lourdo.

— Moun paouré Jean, éï guaïré poussiblé dé ou diré ou chaou véïré, oqu’élous qué disoun qué lo réligiéou és foutudo soun pas esta o Lourdo aoutromen dirién pas oco.

— Et quon couosto lou chomi de féré ?

— Oquest’on couosto pas que 26 francs et démi cos pas cher pér estré tont luén ; sé vouos véni foraï réténé ta plaço.

— Eï tont bé, o quaou sé chaou odréïssa ?

— O moussu Fayolo, lou cura d’Annonay, lou directur déï pélérinagé, as pas besoun de té déirénja iéou foraï tout oco.

— Enfin mais couonto mé en paou coum’oco vaï oval o Lourdo.

— T’en dounoraï bé un pétit operçu, mais pas d’uéi, vendras un aoutro fés.

— Eh bé, adussia ocos entendu.

Un Pélerin

La Croix de l’Ardèche | 17 07 1892

Anem a Lorda

Lo 14 juilhet e lo 13 septembre

— D’onte venes, Jan, l’òm diriá que siás enquiet.

— Me’n parles pas, mon paure Jausèp, veni de vèrs lo talhur ; l’autre jorn aviái pres mesura d’un abit per anar a Nimes ei 14 juilhet, iara pòt pas me lo faire.

— Ieu mai me li chau ben anar prene mesura, mè encara ai ben lo temps d’aicí ei 13 setembre.

—Onte vòs anar lo 13 de setembre ?

— Sabes pas qu’aqueste an i a un autre pelerinatge, a Lorda ; legisses pas donc lo jornal (la Croix) lo jornal dels catolics ; aquí auriás vist.

— Encara vòs tornar a Lorda, tu que li siás anat dos còps ?

— Oui li siái estat dos còps e aqueste an farà tres, mai me’n repenti pas.

— E tu de que vas faire a Nimes que li vas totes los ans.

— Quò’s qu’a Nimes lo 14 juilhet aquò’s bien polit.

— Sabi coma aquò es, li siái estat, pòs pas comparar lo 14 juilhet ende lo pelerinatge de Lorda, quò’s coma la nuèt ende ei jorn.

— Cònta-me un pauc de que i a tant a Lorda.

— Mon paure Jan, es gaire possible de o dire o chau veire, aquelos que dison que la religion es fotuda son pas estats a Lorda autrament dirián pas aquò.

— E quant còsta lo chamin de fèrre ?

— Aqueste an còsta pas que 26 francs e demí quò’s pas chèr per èstre tant luènh ; se vòs venir farai reténer ta plaça.

— Eitant ben, a quau se chau adreiçar ?

— A monsur Faiòla, lo curat d’Annonay, lo directur dei pelerinatge, as pas besonh de te desrenjar ieu farai tot aquò.

— Anfèn mè cònta-me un pauc coma aquò vai aval a Lorda.

— Te’n donarai ben un petit aperçú, mè pas duèi, vendràs una autra fes.

— E ben, adussiatz aquò’s entendut.

Un Pélerin

La Croix de l’Ardèche | 17 07 1892

occitan.org