1977 01 JAUSÈP E LO COLONÈL
Jooùsé et lou Coulounel
Erous o lo garo dé Son Sauvor quand lou Jooùsé descindé d’ooù trin.
En mé veïré, lou paouré bougré mé digué :
— M’ont quand mêmo latchas !
et pouché ein long choupir...
Ah ! oyo pas invinta lo poudro, lou Jooùsé ! Ero pas fi, mais èro bravé coummo ein sooù, et èro tallomin vergougnous... !
Tout oyo coumminça qu’on déoupugué possa lou counseil dé révisiou.
S’in fasio uné souchi aqué paouré diablé ! Oyont beau diré, mais aquèro pas ré qué dé sona faïré veïré vaï Viollo, dovont tant dé moundé, ellé qué èro djomaï bien sourti... !
S’èro bé fréta in paoù lous pès, ooù bachas dé so cour, dovont qué dé porti, mais quand sé veïgué o lo mairie, dovont aquéous estrangiès golounas et toutès lous mairos d’ooù cantou, ossétas et olignas din lo sallo, d’in paoù maï ovognio péchaïré... !
Quand vingué soun tour, oyo bé quitta sous souliès, sous bas et so chomiso, mais aquèro lou resto.. !
Lou paouré bougré... ! sorravo bien fouort sos brayos couontro soun ombougni et tromblavo coummo eino fueillo... !
— Allons ! Quittez votre pantalon !
— .....
— Allons !
— Mouchur… mé faï dé peino... !
Touto la sallo sé boué o riré.
Ah ! èrount durs d’aqué teimp ! Hueï lou Joousé s’orio resta vas ellé, et obé ein bouon chertifica d’ein médéchi, orio pas bouidja. Car, lou pu fouort, aquès qué sugué bo per lou servicé !
Per lou counsoula, li disions bé qué èro bo per los fillos, aquo li inlévaro pas soun tourmin... !
Et ein djour, lou Jooùsé, déoupugué porti, offecta din l’ortillorio o Lyoun... !
Ah ! l’orion djomaï déoupu préné... !
So paouro mèro l’occoumpogné intro vaï Son Sauvor. En los orribin, soun Jooùsé li digué :
— Moun Diéou ! qué la Francho es bello... !
Ero djamaï ona to luin !
O lo coserno, n’iorribé dé toutos, bien chur, per qué èro illétra et porlavo gaïré dé fronchais.
Vous countoreï qué lo dorreïro :
Oprès huet djours, lous bleùs suguèrount presintas ooù Coulounel.
Aquèro ein bravé hommé aqué Coulounel.
Lou Sergeont oyo bé eïssoya dé rossura nostré Jooùsé :
« Le Colonel passera devant chacun de vous, il vous posera des questions :
Que faisiez-vous avant le régiment ? de quelle région êtes-vous ? etc... ».
Lou Jooùsé s’èro bien proumétu dé bien respouondré...
Lou moumeint èro vingu.
Débout, sans bouidja, nostré soudart ottindio soun tour en préporein sos respouonsos, din so paouro testo :
« Si mé démondo dé qué fasiou, direï... » — et qué té viro so linguo set cops dins so gouordjo, avè lous quaoùcous mous dé fronchais qué sobio —.
Aquo liès !
— Eh vous, mon brave ! Que faisiez-vous dans le civil ?
Ah moun hommé ! Li laïssé pas casi féni so question. Lo linguo d’ooù Jooùsé sé destimbré coummo ein ressouort :
— Colonel, mon cultivateur... !
Lou Coulounel monqué dé toumba o lo ronverso !
Li digué pas maï, mais huet djours pu tard, lou Jooùsé èro bouta din lou trin, èro réfourma !
Suromeint qué li oyo prou d’ein Coulounel din lou régimin... !
Lou LOUISSOU dé la MARIE.
Les Amis de St-Pierreville | 01 1977
Jausèp e lo colonèl
Èros a la gara de Sant Sauvaor quand lo Jausèp decendèt dau trin.
En me veire, lo paure bogre me diguèt :
— M’an quand mèma laschats !
E possèt un lòng sopir…
A ! aiá pas enventat la podra, lo Jausèp ! Èra pas fin, mè èra brave coma un sòu, e èra talament vergonhós… !
Tot aiá començat quand deupuguèt passar lo conselh de revision.
Se’n fasiá une socit aquel paure diable ! Aián bò dire, mè aqu’èra pas ren que de s’anar faire veire vas Viala, davant tot lo monde, ele que èra jamai bien sortit… !
S’èra ben fretat un pauc los pès, au bachàs de sa cort, davant que de partir, mè quand se veiguèt a la mairie, davant aqueus estrangièrs galonats e totes los mèras dau canton, assetats e alinhats dins la sala, d’un pauc mai avaniá pechaire… !
Quand venguèt son torn, aiá ben quitat sos solièrs, sos bas e sa chamisa, mè aqu’èra lo rèsta… !
Lo paure bogre… ! sarrava bien fòrt sas braias còntra son ambonilh e tramblava coma una fuèlha… !
— Allons ! Quittez votre pantalon !
— …
— Allons !
— Monsur… me fai de pena… !
Tota la sala se botèt a rire.
A ! èron durs d’aquel temps ! Uèi lo Jausèp sariá restat vas ele, e aube un bòn certificat d’un medecin, auriá pas boijat. Car, lo pus fòrt, aqu’es que suguèt bòn per lo service !
Per lo consolar, li disián ben que èra bòn per las filhas, aquò li enlevava pas son torment.
E un jorn, lo Jausèp, deupuguèt partir, afectat dins l’artilhariá a Lion… !
A ! l’aurián jamai deuput prene… !
Sa paura mèra l’acompanhèt entrò vas Sant Sauvaor. En lais arribent, son Jausèp li diguèt :
— Mon Dieu ! que la França es bèla… !
Èra jamai anat tant luènh !
A la casèrna, n’i arribèt de totas, bien sur, perque èra illetrat e parlava gaire de francès.
Vos contarai que la darrèira :
Après uèt jorns, los blèvs suguèron presentats au Colonèl.
Aqu’èra un brave òme aquel Colonèl.
Lo Serjant aiá ben eissaiat de rassurar nòstre Jausèp :
« Le colonel passera devant chacun de vous, il vous posera des questions :
Que faisiez-vous avant le régiment ? de quelle région êtes-vous ? etc… »
Lo Jausèp s’èra bien prometut de bien respòndre…
Lo moment èra vengut.
Debot, sans boijar, nòstre sodard atendiá son torn en preparent sas respònsas, dins sa paura tèsta :
« Si me demanda de que fasiu, dirai… » — e que te vira sa lenga sèt còps dins sa gòrja, avè los quauquos mots de francès que sabiá —.
Aquò li es !
— Eh vous, mon brave ! Que faisiez-vous dans le civil ?
A mon òme ! Li laissèt pas quasi fenir sa question. La lenga dau Jausèp se destimbrèt coma un ressòrt :
— Colonel, mon cultivateur… !
Lo Colonèl manquèt de tombar a la ranvèrsa !
Li diguèt pas mai, mè uèt jorns pus tard, lo Jausèp èra botat dins lo trin, èra reformat !
Surament que li aiá pro d’un Colonèl dins lo regiment… !
Lo Loïsson de la Marie
Les Amis de St-Pierreville | 01 1977
© Denis Capian, 2013
occitan.org