1886 10 10 CHAU PAS VOS ESTONAR
Chrounico Patoiso
Chaou pas vous estouna, mous omis, si tout oco pu crossous sé trobo toujour dïn lou parti d’oï républicain. Si li o un ladré éntucon, coï lious chèfé dé filo.
Voui disé éiço o l’occosiéou d’éi doun qué lou duqué d’Aumalo vén dé faïro o lo Franço, pér voui métré lo fomillo royalo én coumporosou émé l’homé lou pu ovaré qu’ayoun én Franço, Grévy.
Dé qu’o fa lou viel et paouré moblé dé lo républiquo despiéi qu’es én plaço ? et dé qu’on fa loui d’Orléan ?
Lou vieillas o ré maï fa qué coucha loui lopïn, et signa touto mèno dé soutisassos qu’on pourta nuéiso o lo Franço, os countribuablé, et surtout o lo réligiéou. O léissa roouba et ossocina, o mèmo oprouva lou vol, l’ossocina én ou émpochén pas coumo èro soun dévoir quand sous ministrés ou fosion, ou fosion faïré.
Per lous curas, on restitua oquestoui jour én caoucous us, tout escha, et éncaro, voudrion qué l’an liur diguessé : Gromoci !... Un voulur mérito jomaï dé gromoci mèmo quand restitua. Qué produisioun én public lous chèfés d’ocusociéou couontro oquélous qu’oyon suprima ! En justicio, ocètoun los excusos, d’os pu gron céléras. Réfusoun tout oco éi clerjat, perço qué saboun qué oquélous qué liour on monda dé ropouor soubré lous curas, soun républicain, cropulos et mantur, et qué iélous soun voulur.
Or loui voulur odmétoun gis d’excusos, et n’én pouodoun gis odmétré.
Doun per n’én révéni éi viel dé Vaudrey, disé qu’ oréfa qué dé soutisos, s’és coundui coumo lou pu ladré d’os ovarés. Jomaï li on vis douna un soou per uno obro d’humonita. Et pamén, es poya per millioun, et chèfé d’Etat. Bouon exemplé ! Faï hounou o lo républico et oï républicain !! Et lo paouro Franço, qu’éngraïsso uno bando dé bramofan !
Dé qu’on fa lous prïncés d’Orléan ? Lou duc d’Aumalo vén dé douno o lo Franço 30 milloun, lou léndéman qué lo cossibraillo qu’ovén lo hounto dé veyré én testo d’éi gouvernomén, l’oïo métu défouoro. — Iel, coumo soui nébous lou comté dé Poris et lou duqué dé Chartres èroun lo prouvidanço d’os paourés oqui vount’ hobitavoun maï os énviroun. Loui journaou d’oquélous poïs porlavoun o tout moumén dé liour bienfa. Caou o jomaï oousi diré qué Grévy, Freyciné, Goubélé et lo bando ayoun soulomen béila un soou én d’un malhurous ? L’onnado d’éi choléra, lou duqué dé Chartres, oné visita lous paourés épidémiquo dé Morseillo, et liour distribuavo soun orgén o pleino man. Lou comté dé Poris n’envoyé tant qué pougué ; lous ovesqués, surtout oquel dé Viviès, curèroun liour bourso o li pas léissa un soou. Con douné Grévy ?... Pas un céntimo.
Perqué crésè qué loui républicain ayoun métu lous prïncés fouoro Franço ? Parço qué fosion maï dé bien qué iélous ! Eroun jolousés, et oyon poou qué lou puplé féniguessé per répréné soun bouon sén, et loui démondessé.
Lou puplé séro hurous et prospèré qué quand auro dé moundé coumo oco per lou gouverna.
Chaou, en testo d’un gouvernomèn, (qué s’opélè républico ou coumo voudré,) dé chéfés hounestés qué favourisoun loï avoï gén, noun pas dé crapulos qué favourisoun ré qué lous couquis et lo cossibraillo !
Oprès tout ço qué sé véy, l’an coumprén pas coumo l’i o dé gén prou laschés, pér diré qué lou Féçouyrié parlo trop maou d’oï républicain ! Liou dit qué lious véritas et coï dé véritas qué soun dé diré. Bien ovuglé lou puplé qué montén dé poriés houmés.
— Chaou diré éi puplé cé qué soun souï gouvernaïrés, et :
« Séloun lou bestiaou, lo posturo. » Un àsé és un àsé ; — un couqui és un couqui !
Lou Féçouyrié.
Le Patriote de l’Ardèche | 10 10 1886
Cronica Patoasa
Chau pas vos estonar, mos amics, si tot aquò pus crassós se tròba totjorn dins lo partit das republiquèns. Si li a un ladre entucòm, quò’s lhos chèfe de fila.
Vos dise aiçò a l’òcasion dei don que lo duque d’Òmala vèn de faire a la França, per vos metre la familha roaiala en comparason eme l’òme lo pus avare qu’àiom en França, Grévy.
De qu’a fat lo vièlh e paure mòble de la republica despuèi qu’es en plaça ? e de qu’an fat los d’Òrlean ?
Lo vielhàs a ren mai fat que cochar los lapins, e sinhat tota mena de sotisassas qu’an portat nuèisa a la França, as contribuables, e surtot a la religion. A laissat raubat e assassinar, a mèma aprovat lo vòl, l’assassinat en o empachent pas coma èra son devoar quand sos ministres o fasián, o fasián faire.
Per los curats, an restituat aquestos jorns en quauquos uns, tot eschàs, e encara, vodrián que l’am lhur diguèsse : Gramací !… Un volur merita jamai de gramací mèma quand restitua. Que pròduísion en public los chèfes d’acusacion còntra aquelos qu’aián suprimat ! En justícia, accèpton las excusas, das pus grands scelerats. Refuson tot aquò ai clerjat, per çò que sabon que aquelos que lhor an mandat de rapòrts sobre los curats, son republiquèns, crapulas e manturs, e que ielos son volurs.
Òr los volurs admeton gis d’excusas, e ne’n pòdon gis admetre.
Donc per ne’n revenir ai vièlh de Vaudrey, dise qu’a ren fat que de sotisas, s’es conduit coma lo pus ladre das avares. Jamai li an vist donar un sòu per una òbra d’umanitat. E pasmens, es paiat per milions, e chèfe d’Etat. Bòn exemple ! Fai onor a la republica e as republiquèns !! E la paura França, qu’engraissa una banda de bramafams !
De qu’an fat los princes d’Òrlean ? Lo duc d’Òmala vèn de donar a la França 30 milions, lo lendeman que la cacibralha qu’avem la onta de veire en tèsta dei governament, l’aiá metut defòra. — Iel, coma sos nebots lo còmte de París e lo duque de Chartres èron la providança das paures aquí vont abitavon ’mai as environs. Los jornaus d’aquelos país parlavon a tot moment de lhor bienfats. Quau a jamai ausit dire que Grévy, Fraissinet, Gobelet e la banda aion solament bailat un sòu en d’un malurós ? L’annada dei còlerà, lo duque de Chartres, anèt visitar los paures epidemicas de Marselha, e lhor distribuava son argent a plena man. Lo còmte de París, n’envoaièt tant que poguèt ; los avesques, surtot aquel de Vivièrs, curèron lhor borsa a li pas laissar un sòu. Quant donèt Grévy ?… Pas un centima.
Perque cresètz que los republiquèns aion metut los princes fòra França ? Parça que fasián mai de bien que ielos ! Èron jaloses, e aián paur que lo puple feniguèsse per reprene son bòn sens, e los demandèsse.
Lo puple serà urós e pròspère que quand aurà de monde coma aquò per lo governar.
Chau, en tèsta d’un governament, (que s’apèle republica o coma vodretz,) de chèfes onèstes que favorison las bravas gents, non pas de crapulas que favorison ren que los coquins e la cacibralha !
Après tot çò que se vei, l’am compren pas coma li a de gents pro lasches, per dire que lo Feçoirièr parla tròp mau das republiquèns ! Lhos ditz que lhos veritats e quò’s de veritats que son de dire. Bien avugle lo puple que manten de parièrs òmes.
– Chau dire ei puple ce que son sos governaires, e :
« Selon lo bestiau, la pastura. » Un ase es un ase ; — un coquin es un coquin !
Lo Feçoirièr
Le Patriote de l’Ardèche | 10 10 1886
© Denis Capian, 2013
occitan.org