1960 09-10 LO LAURAT FAI LA VÒGA

Lou Blaguaïré …

… vous parlo

Lou Lauro faï la voguo

Aquélou Baquioulous en pas énvénto lo poudro et lou Lauro y pas ni may bien fi… ! En’djour dé voguo à Sant-Agrévé n’iaribait bé éno drôlo… S’apountchavo davant toutis lou manèdjés quand véguait sus lo Grand’Plaço én atroupomen. Visté s’avanço : « Qu’aco sero paouro ? Disoun qu’acouèi én escamouteur ! » Eno mouquèro ibourifa bramavo : « Cent frnacs seulement et vous verrez opérer le grand escamoteur du siècle. Messieurs et Dames avancez donc ! » Lou Lauro baylo soun billit et vaï s’asséta soun tchapel à lo pountcho dé lo testo coumo toudjour. En petit homme s’esclamo : « Bravo ! Voici l’homme que j’attendais pour ouvrir la séance. Qu’il me prête son chapeau et j’en ferai sortir un lapin. Vous ne pourrez pas dire que je triche avec le chapeau du monsieur ! »

— « Tenez, véqui moun tchopel si mé beyla lou lapi. Mé li fasia pas dé besquisa dédin, perqué téné qué duré longtens…

— Ne craignez rien. Mais dites-moi si vous aimez les omelettes !

— Ma fi ouèi.

— Eh bien ! commençons par l’omelette !

— Oh ! praco paouro. La fasé pas aou lard perqué aco gréïçorio lo couifo… !

Tout lou moundé s’espétavo dé réiré.

L’escamouteur bouté dous yéous din lou tchopel, aoubé dé buré, dé saou, dé péouré, et moun Baquioulou marounavo commo èn tcharri. Tout d’en cop : Vlan ! lou briquet alumo, l’escamouteur anavo bouta lou fioc. Aquesté co, lou Lauro pougué plus téni én plaço et saouto lo barrièro én disan : « Escamouteur dé malheur ! M’avé quiro cent francs per fa flamba moun tchopel, sacré vouleur qué sé ! Vaou souna lou djendarmo daqué pas »

Lou djendarmo dé factiou rigoulavo tout èn fasén beyla lou tchopel. Aquesté n’avio pas dé maou. Sentio én paou lou roussi coumo én tchat qué sé brûlo. — « Imbécile ! dit lou djèndarmo, pourquoi prêtais-tu ton chapeau ?

— Ma fi, moussu lou djèndarmo, créyou qué l’escamouteur mé payorio én tchopel tout naou. Ma couéi bo ! Aro qu’éy moun tchopel m’enterné. Adussia toutés et ana vous fa foutré aoubé vostro voguo ! »

Paul Paya.

Envol | 09-10 1960

Lou Blagaire …

… vos parla

Lo Laurat fai la vòga

Aquelos Bastiolons an pas enventat la podra e lo Laurat es pas nimai bien fin… ! Un jorn de vòga a Sant Agreve n’i arribèt ben una dròla… S’aponchava davant totes los manètges quand veguèt sus la Grand Plaça un atropament. Viste s’avança : « Qu’aquò serà paura ? Dison qu’aquo es un escamotèr ! » Una moquèra esborrifaa bramava : « Cent francs seulement et vous verrez opérer le grand escamoteur du siècle. Messieurs et Dames avancez donc ! » Lo Laurat baila son bilhet e vai s’assetar son chapèl a la poncha de la tèsta coma totjorn. Un petit òme s’exclama : « Bravo ! Voici l’homme que j’attendais pour ouvrir la séance. Qu’il me prête son chapeau et j’en ferai sortir un lapin. Vous ne pourrez pas dire que je triche avec le chapeau du monsieur ! »

— Tenètz, vequí mon chapèl si me bailatz lo lapin. Mè li fasiatz pas de bestisas dedins, perque tene que dure lòngtemps…

— Ne craignez rien. Mais dites-moi si vous aimez les omelettes !

— Ma fe oèi.

— Eh bien ! commençons par l’omelette !

— Ò ! pr’aquò paura. La fasètz pas au lard eprque aquò graissariá la coifa… !

Tot lo monde s’espetava de reire.

L’escamotèr botèt dos uòus dins lo chapèl, aube de burre, de sau, de peure, e mon Bastiolon marronava coma un charri. Tot d’un còp : Vlan ! lo briquet alumat, l’escamotèr anava botar lo fuòc. Aqueste còp, lo Laurat poguèt plus tenir en plaça e sauta la barrièra en disant : « Escamotèr de malèr ! M’avètz tirat cent francs per far flambar mon chapèl, sacre volèr que sètz ! Vau sonar lo gendarma d’aquel pas. »

Lo gendarma de faccion rigolava tot en fasent bailar lo chapèl. Aqueste n’aviá pas de mau. Sentiá un pauc lo rossit coma un chat que se brula.

« Imbécile ! ditz lo gendarma, pourquoi prêtais-tu ton chapeau ? »

— Ma fe, monsur lo gendarma, creiu que l’escamotèr me paiariá un chapèl tot nòu. Mas quo es bòn ! Ara qu’ai mon chapèl m’entuèrne. Adussiatz totes e anatz vos far fotre aube vòstra vòga ! »

Paul Paya

Envol | 09-10 1960

occitan.org