1892 09 22 UN SOVENIR DEL PASSAT

CROUNICO PATOISO

 

Un souvenir del passa.

 

Uéi, mous bravés amis, célébrén une dato bien glouriouso, qué nous rappèlo lou 22 sétémbré 1792, jour mémourablé qué nostrés grans pèros prouclomèroun per lo proumièro fés la Républiquo. Mé, lous paourés, aguéroun pa la man urouso én counfién sa gardo al 1^er Napoléon, que l’estoufé bien jouvé per sémpara de soun eiritagé.

Nostrés péros dé 48 aguéroun éncaro la féblesso dé la counfia a ün aoutré Napoléon, qué avio jura aoussi dé la proutéja, mé quon lo téngué, soun prumié suén fougué dé l’y touordré lou couol.

Pourton, soun tour véngué dé lous rondré la mounédo dé lus pesso et lous très cor faguéroun luto.

Lou 4 sétémbré 1870 tourné ressucita et en  apprénén sa naïssenso, touto la bando Bonapartisto filé a l’improuvisto son tambours ni troumpétos èn nous laïssén dïn dé dras bien salés et après avéré livra nostros armados al mounarquo dél Nord.

Iéou mé rappelé aquélo dato coumo cé aco éro uéi. Eré asséta quel souer davon ma pouorto per préné lou frés et countemplavé uno éstouélo, qué brillavo al firmamén d’uno clarta bien vivo, et mi demandavé dé qué oco poudio dévina. Tou dün co énténdéré crida : Vive la Republique ! Vitomén coureguéré a léndré doun té vénio lou bru et enténdéré lou cridaïré public qué léjissio uno despacho anouncén qua l’Aoutel de Villo dé Paris vénio dé brullia uno génto Mariannéto én d’uno païro duéls vigourousés qué avio pa ler mourtelo.

Coumo sy trouvavo ourphelino, lou gron Patrioto Gambetta, soun païré, la préngué soubré sa gardo et fagué désfouors surumains per la proutéja dé soun méi.

Mé dïn caouqués jours après la placéroun en nourisso chez Moussu Thiers. Lou paouré fajo bé soqué poudio per lo soigna, mé sa fénno éro ’ün paou vieillo, avio pa jis dé laï et la fajo téta al biberou. Dé sorto qué, l’idéio lous préngué én vésén quéro bien maïgreto de la chanja et dé la métré chez lou Marechaou Mac-Mahon. Dé las fiévrés toumbé al maou chaou.

Lou vénqur dé Magenta, la ménavou coumo ün piou piou d’Aouvergné et la fajio créba dé fon, péchaïré ! Un mati, del 16 Maï, qué séro léva de maouveso umour, té ly fouté ün co de soun sabré qué sero pa servi despiéi Sedan et sén fagué dé rien que l’y partajessé la testo, la paoureto manqué à ni cloqua.

Con véguéroun aco la ly garéroun et la météroun chez Moussu Grévy, ün bien bravé omé, qué nagué bien suén et coumencé dé si repréné un paou. Mé aquel Moussu, maridé sa fillo et soun gendré jalous dé los caressos dé soun béou péro, per aquelo nourissouno, si plaségué à ly faïré tou plé dé nichos. Alors la counfieroun à Moussu Carnot, que no prés ün suéen tout espécial et despiéi aco o bien chanja de fasso.

Sous énémis lon laïssado tranquilo et quon on vougu la tourménta on trouva a caou parla, lous Boulangistos vous ou diron.

Dé sorto qué uéi o possa l’âgé critiquo, o atten sous 22 ons et jouis d’uno santa merveillouso. Régardo cranomén en fasso sous adversairos que aousoun pa leva lus uels soubre iélo et enstruido des malurs de sa gran mèro de 1792, dé sa mèro de 1848, saoupro déjoua lus coumplos et lous téné à lescar bien qué ly fajoun riseto.

Urousomén o après la fablo del courpata et del raynar, sy laïssaro pa préné a lus flatarios.

Souvénén nous, nous aoutrés aoussi, del passa et qué aco nous siajo dé laïssou per lavenir.

 

JAN.

 

 

 

Un sovenir del passat

 

Uèi, mos braves amics, celebrem una data bien gloriosa, que nos rapèla lo 22 setembre 1792, jorn memorable que nòstres grands pèras proclamèron per la promièra fes la Republica. Mè, los paures, aguèron pas la man urosa en confient sa garda al 1^èrNapoléon, que l’estofèt bien jove per s’enparar de son eiritatge.

Nòstres pèras de 48 aguèron encara la feblessa de la confiar a un autre Napoléon, que aviá jurat aussi de la protejar, mè quand la tenguèt, son prumièr suènh foguèt de li tòrdre lo còl.

Portant, son  torn venguèt de los randre la moneda de lus pèça e los tres còrs faguèron luta.

Lo 4 setembre 1870 tornèt ressuscitar e en aprenent sa naissença, tota la banda Bònapartista filèt a l’emprovista sans tamborns ni trompetas en nos laissent dins de draps bien sales e après avere livrat nòstras armadas al monarca del Nòrd.

Ieu me rapèle aquela data coma se aquò èra uèi. Ère assetat quel soèr davant ma pòrta per prene lo fresc e contemplave una estoèla, que brilhava al firmament d’una clartat bien viva,e mi demandave de que aquò podiá devinar. Tot d’un còp entendère cridar : Vive la République ! Vitament correguère a l’endret d’onte veniá lo brut e entendère lo cridaire public que legissiá una despacha anoncent qu’a l’Autèl de Vila de París veniá de brulhar una genta Marianneta ende una paira d’uèlhs vigoroses que aviá pas l’èr mortèla.

Coma si trovava orfelina, lo grand Patriòta Gambetta, son paire, la prenguèt sobre sa garda e faguèt d’esfòrç surumèns per la protejar de son mèis.

Mè dins quauques jorns après la placèron en norrissa chez Monsur Thiers. Lo paure fasiá ben çò que podiá per la soanhar, mè sa femna èra un pauc vièlha, aviá pas gis de lait e la fasiá tetar al biberon.De sòrta que, l’idèa los prenguèt en vesent qu’èra bien maigreta de la chanjar e de la metre chez lo MarechauMac-Mahon. De las fièvres tombèt al mau chaud.

Lo vencur de Magenta, la menava coma un piu piu d’Auvèrnhe e la fasiá crebar de fam, pechaire ! Un matin, del 16 Mai, que s’èra levat de mauvèsa umor,  te li fotèt un còp de son sabre que s’èra pas servit despuèi Sedan e se’n faguèt de rien que li partagèsse la tèsta, la paureta manquèt a ni clacar.

Quand veguèron aquò la li garèron e la metèron chez Monsur Grévy, un bien brave òme, que n’aguèt bien suènh e comencèt de si reprene un pauc. Mè aquel Monsur, maridèt sa filha e son gendre jalós de las carèças de son bèupèra, per aquela norrissona, si plaseguèt a li faire tot plen de nichas. Alòrs la confièron a Monsur Carnòt, que n’a pres un suènh tot especial e despuèi aquò a bien chanjat de faça.

Sos enemics l’an laissada tranquilla e quand an vougut la tormentar an trovat a quau parlar, los Bolangistas vos o diràn.

De sòrta que uèi a passat l’atge critica, a atent sos 22 ans e joís d’una santat mervelhosa. Regarda cranament en faça sos adversèras que auson pas levar lus uèlhs sobre iela e enstruida dels malurs de sa grandmèra de 1792, de sa mèra de 1848, sauprà dejoar lus complòts e los téner a l’escart bien que li fajon riseta.

Urosament a aprés la fabla del corpatàs e del rainard, si laissarà pas prene a lus flatariás.

Sovenem-nos, nosautres aussi, del passat e que aquò nos siaja de leiçon per l’avenir.

 

Jan

 

 

 

La Démocratie de l’Ardèche | 22 09 1892

 

Denis Capian, 2012

 

occitan.org