1906 05 05 LO COMITAT DE VÈRS LO ROS

CHROUNICO PATOISO

Lou coumita dé veï lou Roux

Louoï. — Yéou vouté per Vincent, qu’os in bouon bougré, a pas paou é diré qu’ès éfon dé païson, nouï défindro bièn quand soro députa.

Jaousè. — Yèou vouté pas per Duclaou, ès trop fier, counèï qué los bellos vestos ou louï bèous pardéssus ; pouo pas soulomin diré bouontjour quand trouobo in paouré bougré.

Jacqué. — Sans counta qué qu’os in cofard, creïdo vivo la Républiquo et traïno qu’indé louï bloncassés.

Frédo. — Dins soun païs, vaï pas à la gleyzo, in mountagno, lous curas disoun dé vouta per el, si ouzavoun l’imbrassarion ; l’aoutré tjour l’appélavoun ayglé, farion maéï dé l’oppéla courpatas.

Qu’os in égoïsto, s’ès pas soulomin sinti lou couratgé dé nourri éno féno !

Sé sourtio ét qué sous omis tinguéssioun lou mantché, adussia à la paix, vivo la guerro, è surtout la guèrro civilo ! Vincent n’in sa qu’aoucon ! adussia a los rétraitos et à la Liberta pèr lous ouvriers dé sé fourma in syndicat ! adussia à la suppréssièou d’os Counsels dé guèrrou qué coundannoum lous saoudarts é acquittoum lous capitènos ! adussia à la fi d’os 13 tjours è à la diminutiéou d’os 28 tjours ! adussia l’espoir dé véïré nostous éfons s’instruiré è s’éléva per liour mérité è liour testo ! adussia l’espoir dé véïré establi l’impaou soubré lou révénu qué destchargeario lous païson è fario paya lous omis dé Duclaou ! adussia à tout ça qué fario lou bénaïsé d’os païsons è d’os ouvriers ! adussia à la Républiquo è à tout ça qué s’ès fa détjà pèr lous éfons dé la tèrro, dé la mino et dé l’atélier ! Liaouro tjamaï qué lous imbocilés qué voutoron pèr Duclaou, ou lous aristos ; yèou n’in vouolé pas rèssé, é vouté per Vincent !

Toutès. — Vivo Vincent è lo Marianno !

Frédo. — Qu’os intèndu, à Démintché per tailla lou pardéssus dé Duclaou !

Le Républicain des Cévennes | 05 05 1906

CRONICA PATOASA

Lo comitat de vèrs lo Ros

Lòi. — Ieu vote per Vincent, quò’s un bòn bogre, a pas paur de dire qu’es enfant de païsan, nos defendrà bien quand sarà deputat.

Jausèp. — Ieu vote pas per Duclaus, es tròp fièr, coneis que las bèlas vèstas o los bèus pardessús ; pòt pas solament dire bònjorn quand tròba un paure bogre.

Jaque. — Sans comptar que quò’s un cafard,creida viva la Republica e traina qu’ende los blancasses.

Freda. — Dins son país, vai pas a la glèisa, en montanha, los curats dison de votar per el, si ausavon l’embraçarián ; l’autre jorn l’apelavon aigle, fariá maèis de l’apelar corpatàs.

Quò’s un egòïsta, s’es pas solament sentit lo coratge de norrir una femna !

Se sortiá e que sos amics tenguèssion lo manche, adussiatz a la pès, viva la guèrra, è surtot la guèrra civila ! Vincent ne’n sap quaucòm ! adussiatz a las retrètas e a la Libertat per los ovrièrs de se formar en sendicat ! adussiatz a la supression das Conselhs de guèrra que condamnon los saudards e aquiton los capitènas ! adussiatz a la fin das 13 jorns è a la diminucion das 28 jorns ! adussiatz l’espoar de veire nòstos enfants s’entruire è s’elevar per lhor merite è lhor tèsta ! adussiatz l’espoar de veir establir l’impaus sobre lo revenú que descharjariá los païsans è fariá paiar los amics de Duclaus ! adussiatz a tot çò que fariá lo benaise das païsans è das ovrièrs ! adussiatz a la Republica è a tot çò que s’es fat dejà per los enfants de la tèrra, de la mina e de l’atelièr ! Li aurà jamai que los embeciles que votaràn per Duclaus, o los aristòs ; ieu ne’n vòle pas rèsser, e vote per Vincent !

Totes. — Viva Vincent è la Marianna !

Freda. — Quò’s entendut, a Deminche per talhar lo pardessús de Duclaus !

Le Républicain des Cévennes | 05 05 1906

occitan.org