2007 12 LA QUINCY DEI THIERRY

La Quincy dei Thierry

Dumintché passat, coummo fasio bouon témps, mé seil ana prouména dé vés Sa- Marty. Eil prés la routo dé Tchadrou pré pountcho, passa lou petiot pouont dé la Gazeillo. Eh, en arriben soubré la plono sé té en bel estaou, quo s’appelo « lou Chalet Rose », quo dato dé veil ! di temps dé la guerro, bléou en paou davos mèmés ? Fasiont dansa ; ma Mamo s’en rappelo « quos’o en paou tchanga ! » sé diguet, y anavo à pè dé Flura, pré la couosto d’ous Rabirous ou pré Bonnofouond .Quéro lou temps dé la valso ou la boureillo, sé parlavo pas encaro dé « yéyé », dé « pop » ni mail dé « techno ».Y aio dé paraoulos, aiaro, font mè dé bru en trapizen de tout biail ! Eh encaro vous parlé pas dé « hip, hop » davont guerro fasion bé quaouqué cop hop, mé son lou « hip » ! Quéro lou Grand pairé deil Thierry dé Rotcho qué ou ténnio. Avez surament couneilsu soun pairé… ? Eh si, anen lou Milô, qué lévavo lou lait pré la Coopérativo ! Eh bé, quos soun garçou qué y damouoro iaro. Quon pensé à qui Milo, lou trabail qué fasio ! N’o gaza dé cougnieiros embé soun camioun ! en mounten aves Tchabonnos (quos di cousta dé Coucourou). Diré qué iaro io dé plein djounaous dé moundé qu’on dé médaillos « d’honneur » di trabail, eh qué soun nov soubré dés qué tout cé qu’on fa quos d’atchaba ur tio dé braillo soubré en fauteuil dé bureau, n’en troubarez pas un soubré dés qué la méritoun. Quos ena vergougno ! Eh qui paouré Milo qu’o gaza la ciro touto sa vido y on bléou pas mêmés dit merci !

Quo fai qué, en arriben à la plono, l’air éro viou, putain !… Eh dé l’aoutré las di termé viguéré douos ouréllos  éh na cagnisso bloundo, à cousta, en hommé, l’eil bé récounissu émbé sa barbo dé hué jours… Nou, quos pas vérail éro rasa dé frés. Quo s’éro Thieery embé sa Quincy ? Mé ? Vous vésé ratchania !? Moun Diéou, pra quo ! Avez crésut qu’éro en sa mestresso ! Anen, faï pa en temps pré faïré dé courbobéssinos sous lous termés embé las Bloundos ! Nou ! La Quincy…quos soun égo ! Sé vésia qu’ella bestio ! dariés, és quasi iton lardjo qué soun trateur, gaïré s’en monquo, tcho diré qué lou « Pan)-pan », coummo l’appélo, faï pas ceint tchavaous, quos mé en « D 22 »,dous cylindrés,pan, pan… coumprénez ?

Qui Thierry, quos en hommé bien di taraïré, o poussa y Chalet—Rose, éh couneil bien lou païs ama lou moundé, éh lou patoés maï, éh monquo pas dé maïco. Embé soun coullègo, lou Marc, qué zéi o meil ama ana fà lou fateur dinc lou Meidjour ; y faï pas tô fréi, couioun ! Mé quont ô en moument, s’acampo, l’air dé la mountogno y monquo. Eh toutés dous s’amusoun embé qui tchavail, aneil, partiont laoura ves Dgilou, en estouillo. Alors, coummo aïo moun « appareil à photo numérique », iaro quos tout pré uméro, mêmés las photos ! sabé pas coummo font aquo ? Lous appareils « ardgentiqués »quos fégnit, quos pas éstounont, tout ougmento talament qué dindus o pus d’ardgent,Alors y o touidjour en pu fi qué trobo en biail pré nous poumpa lou paou qué nous resto ! Numérique ! n’ont d’ideillos, on bouta dé uméros entro dinc las ouréllos d’ous tsis, pamin saboun pas lédgi. Mé révénent à noust-égo, m’esparpaillé en paou dé cos !

Alors s’en anas attala lou brabant, quos en Huard, és tout nov, pamin ô bléou cinquant-ons, eh lous tchampaïré fa n’a djounto. Quency, és en paou djoïno, eh pas bien a soun aïsé encaro, mé quo y agrado, coummo sous dous Méssiers, ati soun bénaïsés, quo sé sent ! Dé lous véiré fa quo douno ivédjo d’atchata na bourriquo eh laoura l’hor ; ou fareil pas, mé quand mêmés aquos ticon ! Mè mé direz, coutrédja, quo duro mé en temps, dé qué font tout l’on ? Alors vous vo diré, quos d’imadginaïrés, ont touidjour ena galampio pré souortré lou brabant ou passa l’herso, eh, l’uver passat ô mountat na carriolo, mé quos bien fa ! Eh, quont faï bouo sé vont prouména en famillo ou embé lous vésis, prous tchamis vés las Sallos ou dé l’aoutré las.Vésez, dinc noustous villadges y o dé moundé qué saboun encaro viouré son touidjour couré après sabé iéou déqué ! a la façou dé noustous anciens, mé, eh quos bléou ati lou sécrét, en proufiten dé soqué lou prougrés pouot appourtat.

Dimpeil qué parlé quo m’ô douna en paou sé ! alors vous vô lissa, mé sé passa pré Sa-Marty lous poudez arrécountra ou bléou, l’éstiou qué vé dinc quaouquo festo, ou en « concours de labours », quaou sat ?

Georges Sauret

 

 

Volcan | 2007 12

 

 

La Quincy dei Thierry

Duminche passat, coma fasiá bòn temps, me sei anat promenar devèrs Sant Martin. Ai pres la rota de Chadron pre poncha, passat lo petiòt pònt de la Gaselha. E, en arribent sobre la plana se ten un bèl estau, quò s’apèla lo « Chalet Rose », quò data de vuèlh ! dei temps de la guèrra, benlèu un pauc davans mèmes ? Fasián dançar ; ma Mamà se’n rapèla « quò za un pauc chanjat ! » se diguèt, i anava a pè de Flurac, pre la còsta daus Rabirós o pre Bònafònt. Qu’èra lo temps de la valsa o de la borrèia, se parlava pas encara de « yéyé », de « pòp » ni mai de « tecnò ». I aiá de paraulas, aiara, fan mès de brut en trapisent de tot biais ! E encara vos parle pas de « hip-hòp », davant guèrra fasián ben quauque còp hòp, mè sans lo « hip » ! Qu’èra lo grandpaire dei Thierry de Ròcha que o teniá. Avètz surament coneissut son paire… ? E si, anem, lo Mila, que levava lo lait pre la Còperativa ! E ben, quò’s son garçon que i damòra iara. Quand pense a quei Mila, lo trabalh que fasiá ! N’a gasat de conhèiras embe son camion ! en montent a vèrs Chabannas (quò’s dei costat de Cocoron). Dire que iara i a de plen jornaus de monde qu’an de medalhas « d’honneur » dei trabalh, e que son nòu sobre dètz que tot ce qu’an fat quò’s d’achabar lhur cuòu de braias sobre un fauteuil de burò, ne’n trobaretz pas un sobre dètz que la meriton. Quò’s una vergonha ! E quei paure Mila qu’a gasat la cira li an benlèu pas mèmes dit mercí !

Quò fai que, en arribent a la plana, l’èr èra viu, putèn !… E de l’autre las dei tèrme veiguère doas aurelhas e ’na canissa blonda, a costat, un òme, l’ai ben reconeissut embe sa barba de uèt jorns… Non, quò’s pas verai èra rasat de fresc. Quò zèra Thierry embe sa Quincy ? Mè ? Vos vese rachanhar !? Mon Dieu, pr’aquò ! Avètz cresut qu’èra emb sa mestressa ! Anem, fai pas un temps pre faire de corbabessinas sos los tèrmes embe las blondas ! Non ! La Quincy… quò’s son èga ! Se vesiatz quela bèstia ! darrièrs, es quasi eitant larja que son tracteur, gaire se’n manca, chau dire que lo « Pan-pan », coma l’apèla, fai pas cent chavaus, quò’s mès un « D 22 », dos cilèndres, pan, pan… comprenètz ?

Quei Thierry, quò’s un òme bien dei tarraire, a possat ei Chalet-Rose, e coneis bien lo país amà lo monde, e lo patoès mai, e manca pas de maliça. Embe son collèga, lo Marc, que zei a mèlhs amat anar far lo facteur dins lo Mèijorn ; i fai pas tan freid, colhon ! Mè quand a un moment, s’acampa, l’èr de la montanha i manca. E totes dos s’amuson embe quei chavai, anuèit, partián laurar vèrs Gilon, una estolha. Alòrs, coma aiá mon « appareil à photos numérique », iara quò’s tot pre umerò, mèmes las fòtòs ! sabe pas coma fan aquò ? Los aparèlhs « arjantiques » quò’s fenit, quò’s pas estonant, tot aumenta talament que dengús a pus d’argent, alòrs i a tosjorn un pus fin que tròba un biais pre nos pompar lo pauc que nos rèsta ! Numerique ! n’an d’idèas, an botat de umeròs entrò dins las aurelhas daus chins, pasmins sabon pas legir. Mè revenem a nosta èga, m’esparpalhe un pauc de còps !

Alòrs sem anats atalar lo brabant, quò’s un Huard, es tot nòu, pasmins a benlèu cinquanta ans, e los champaire far ’na jonta. Quency, es un pauc jòina, es pas bien a son aise encara, mè quò i agrada, coma sos dos Messiers, aquí son benaises, quò se sent ! De los veire far quò dona esveja d’achaptar ’na borrica e laurar l’òrt ; o farai pas, mè quand mèmes aquò’s quicòm ! Mè me diretz, cotrejar, quò dura mès un temps, de que fan tot l’an ? Alòrs vos vau dire, quò’s d’imaginaires, an tosjorn una galàmpia pre sòrtre lo brabant o passar l’èrsa, e, l’uvèrn passat a montat una carriòla, mè quò’s bien fat ! E, quand fai bòn se van promenar en familha o embe los vesins, praus chamins vèrs las Salas o de l’autre latz. Vesètz, dins nòstos vilatges i a de monde que sabon encara viure sans tosjorn córrer après sabe ieu dequé ! a la façon de nostos anciens, mè, e quò’s benlèu aquí lo secret, en profitent de çò que lo progrès pòt aportar.

Dimpuèi que parle quò m’a donat un pauc set ! alòrs vos vau laissar, mè se passatz pre Sant Martin los podètz arrencontrar o benlèu, l’estiu que ven dins quauqua fèsta, o un « concours de labours », quau sap ?

Georges Sauret

 

 

Volcan | 2007 12

Denis Capian, 2013

occitan.org