1889 09 21 SON MALAUTS
CROUNICO PATOISO
Soun malaous….
— Sios a qui Jaqué, té véguen pa ier oun té érés ana ?
— Eré vés Privas per faïré arenja lous arnés de moun chivaou.
— Véni qué té pagué la gouto vès la maïré Catin.
— Pouden bé faïré aco.
— Dé qué laï couonto vès Privas ?
— Disoun qué lous cambrïnc soun bien malaous.
— Ba ! ton pis. Yo bé dé médicis pourtan per lous gari, a maï dapouticaïrés.
— Co monquo pa, mé counouissou pa quel maou.
— Lous dounous pajès dé rémèdis ?
— Lous dounou ton, mé quo lus faï rien. Moussu Benoi, lous counseillo dé métré forses emplastrés dé farino dé lïn soubré lou ventré, moussu Blacho, lus dis dé né métré ün dé péjo à la dasassetièmo, moussu Pouzé dé préné uno bono purjo, moussu l’aoutré, savé pa coumo s’apelo, dé préné forses lavamens et de bien sé serïnga.
— Sacordoun pa dé tout per lous rémédis ?
— Sén monquo bé, et rien dé tout aco lous garis pas, aoussi lous on récoumanda à las prièras.
— Et bé aquesté co on trouva lou bo, mé perqué ou fajon pa pu léou ?
— Créjon caco sario pa rien, mé aro vésoun qué dé la manièro qué suèfroun podoun pa ana pu luen qué diménché al souer.
— Péchaïré ! con doumagé ! Requiés can tïn pacé ! Dé qués aco qué lous faï ton maou ?
— Lus testasso.
— Mé bougré si la frétavou bien en mé d’aïgo sédativo, aco lous fario bé de bé.
— Dé qué vas diré aqui Jan, l’aïgo sédativo fougué énvéntado per Raspail et quel célèbré médici éré ün bon républicain, aourion tro poou caco lous tuesso subito.
— Qué sanou fa foutré doun sé volou pa faïré lous bos rémédis. Coumo aco lous prén ? Yo de téms cou couvoun, couménsoun per se métré dïn l’idéio qué pouirion bé coumo lous aoutrés estré mèros, soupréfés, préfés, députas, ministrés a maï réis ou émpérurs.
— Bougré, se mouchoun pa én dün rastel, quélei particuliers.
— Con aco sés foutu dïn lus testo lou diablés lous ou garario pa.
— Laïsso faïré vaï, caouqués cos de buletïns ni gariron di bravés, mé foou de buletïns rougés.
— Pamén toutés lous buletïns soun blons ?
— Co fay pa rien, cos lou nom qué io dedïn que faï tout.
— Faoudro doun vouta per lous rougés ?
— O ! oui moun ami ! a maï fa vouta lous camarados.
— Sabés qué sèroun mestrés, nous en farion véiré dé cruélas.
— Siajos tranquillé Jan, iou faréi bé so qué pouréi. Téné maïré Catin, éi pa lou téms mi faou ana fini de laoura moun caïré, qué coumenso à si fa bien dur, vé qui lous sinsoous dé vostro gouto.
— Lous préné pa, cos iou quéi énvita.
— Diménché pagaréi la miouéo.
— Tou de mêmo, a maï sos lou téms, dilus pourion ana a l’entéromén daquelés paourés cambrïns lous chanta ün déprofundis !!!
JAN.
La Démocratie de l’Ardèche | 21 09 1889
Son malauts….
— Siás aquí Jaque, te veguem pas ièr onte ères anat ?
— Ère vès Privàs per faire arrenjar los arnèscs de mon chivau.
— Vèni que te pague la gota vès la maire Catèn.
— Podem ben faire aquò.
— De que lai cònta vès Privàs ?
— Dison que los cambrins son bien malauts.
— Ba ! tant pis. I a ben de medicins portant per los garir, amai d’apoticaires.
— Quò manca pas, mè conoisson pas quel mau.
— Los donon pas ges de remèdis ?
— Los donon tant, mè quò lus fai rien. Monsur Benoit, los conselha de metre fòrces emplastres de farina de lin sobre lo ventre, monsur Blacha, lus ditz de ne metre un de peja a la dasa-setièma, monsur Poset de prene una bòna purja, monsur l’autre, save pas coma s’apèla, de prene fòrces lavaments e de bien se seringar.
— S’acòrdon pas de tot per los remèdis ?
— Se’n manca ben, e rien de tot aquò los garís pas, aussí los an recomandat a las prièras.
— E ben aqueste còp an trovat lo bòn, mè perque o fasián pas pus lèu ?
— Cresián qu’aquò sariá pas rien, mè ara veson que de la manièra que suèfron pòdon pas anar pus luènh que dimenche al soèr.
— Pechaire ! quant domatge ! Requies cantin pace ! De qu’es aquò que los fai tant mau ?
— Lus testassa.
— Mè bogre si la fretavon bien emme d’aiga sedativa, aquò los fariá ben de ben.
— De que vas dire aquí Jan, l’aiga sedativa foguèt enventada per Raspail e quel celèbre medicin èra un bòn republiquèn, aurián tròp paur qu’aquò los tuèssa subitò.
— Que s’anon far fotre donc se vòlon pas faire los bòns remèdis. Coma aquò los pren ? I a de temps qu’o covon, començon per se metre dins l’idèa que poirián ben coma los autres èstre mèras, soprefets, prefets, deputats, ministres amai reis o emperurs.
— Bogre, se mochon pas end un rastèl queles particulièrs.
— Quand aquò s’es fotut dins lus tèsta lo diables los o garariá pas.
— Laissa faire vai, quauques còps de bulletins ni gariràn di braves, mè fau de bulletins roges.
— Pasmens totes los bulletins son blancs ?
— Quò fai pas rien, quò’s lo nòm que i a dedins que fai tot.
— Faudrà donc votar per los roges ?
— Ò ! oí mon amic ! amai far votar los camaradas.
— Sabes que s’èron mèstres, nos en farián veire de cruèlas.
— Siajas tranquille Jan, ieu farai ben çò que porrai. Tenètz maire Catèn, ai pas lo temps mi fau anar finir de laurar mon caire, que comença a si far bien dur, vequí los cinc sòus de vòstra gota.
— Los prenètz pas, quò’s ieu qu’ai envitat.
— Dimenche pagarai la mièua.
— Tot de mèma, amai s’as lo temps, diluns porriam anar a l’enterrament d’aqueles paures cambrins los chantar un de pròfondís !!!
Jan.
La Démocratie de l’Ardèche | 21 09 1889
Denis Capian, 2010
occitan.org