1886 08 15 PR'AQUÒ PR'AQUÒ PASMENS
Chrounico Patoiso
Proco ! proco ! pamén !! Chaou pas ovèré dé chanço !! Oyo ré qué quatr’ou cïn gerbos dé touzèlo, loï vouguèré estendré dimècré éi moti o moun iéiro per los éngruna, et n’en foguèré pa-t-y pouitrasso !! Coï lou tén d’oï malur, co’s pas poussible.
Sério paré éncaro dé iéou, qué, moun bla s’éissujoro bé, mais co’s oquel paouré Bouléngié dé lo Morianno !! N’én faï dé pouitrassos ! Paouré bougré, vaï ! poudio bé resta Mitroun, noun pas s’ona fa foutré dé iel pertout, et fa préné vergougno én touto lo Franço ! Ço qué lou counsoulo, poréi, coumo ço qué counsoulo toutés loui vorlés dé lo Guzo, co’s qué o touto lo conaillo pér lou monténé...
Aoutré malur : Poréi qué lou mêmo jour, dimècré, lou popa Grévy, porlén per respé, onavo o lo chasso d’os coyous sauvagé, qu’opèloun lous céngla. Soui vésis n’èroun bé in paou estouna, parço qué, soun ocoustumas o lou veyré cruel ré que couontro lous paourés lopïns, mais enfin, co’s pa’qui lou malhur qué volé diré. Cè qué volé diré et qué oyo éibléda dé counsulta lou moti, un pétit librou qué dé coustuma pouorto toujours émé iel. (Amo ton dé légi, surtout soui discoux qué fosio l’on possa o lo Chambro !!) Oquel librou, qué lou quito pas, co’s (ou dovinoria pas !) co’s « l’Ormogna d’éi Féçouyrié ! »... Mais, si l’éiblédé, n’ogué vuno romado !! Otobé, quand réntré vès iel, tout royon dé pertout, trémpé coumo’no soupo, so fenno sé fochavo : « Mais sobios doun pas qu’onavo plâouré vuez ! sou li fosio ! As Bouléngié ?... Perqué pourtavés pas toun Ormogna, simplé !
— Li éi pas pensa ! li éi pas pénsa ! respoundio lou viel ! — Et li as pa pénsa ! Ei pôou qué bien léou éiblédoras toï brayos !! Un aoutré co, quand l’éiblédoras, dijo mé ou, qué iéou té li foréi pénsa !... — As rasou, tè ; tou diréi, té fachés plus et faï m’un poutou, péchaïré !...
Ah ça, iaro, sabés pas ? Poréi qué lou Féçouyrié faï encaro’n aoutré Ormogna per 87 ! Canto chanço ! Vaï, mé bognoréi plus ! Soulomén, coumo caouco fés sé troumpo d’un jour, quand onounço lo pléio, un’ aoutré co otendréi lou sus-lendémo, pér ona o lo chasso.
D’après lou journal réactiounairo dé l’Ardêcho, vêjo’ïci ço qué séro l’Ormogna dé 87. Coumo oquest’on, onounçoro lou tén qué déou faïré, o tout hosar. Diro os fécouyriès lou troval qué dévoun faïré.
Dounoro caoucos flour d’éi porodi ; dé récètos utilos. Lou Chossaïré li trouborou encro caouco foutraillo, mais coumo ieo oquest’on, li éi pas monda, tout cè qué m’ès oriba vès vaudrey, li auro dé pas fouorço scorobillados. Li auro caoucos unos dé los chrounicos dé l’onnado. Li auro dé bouos cousséls dé poulitico, et mil’aoutros bésougnétos... sans counta piéicé un paou dé tout, frimoussados, farços, histoiros, sournétos, prouverbés, qué sabé iéou.
Enfin, lou popié séro pas ton mïncé, et séro tout courdura, perqué lous fuêou s’embouoilloun pas.
Pér lou prix, coustoro coumo « l’Almanach du Pélerin. »
Vün, coustoro 10 sôou ;
S’én béïloro 7 pér 6 prix 3 fr.
» » 15 » 12 » 6 »
» » 70 » 50 » 25 »
» » 150 » 100 » 50 »
» » 350 » 200 » 100 »
Los onounços sé fon paya coumo l’on passa.
Lou Féçouyrié.
Le Patriote du Dimanche | 15 08 1886
Pr’aquò ! pr’aquò ! pasmens !! Chau pas avere de chança !! Aiá ren que quatre o cinc gèrbas de tosèla, las vouguère estendre dimècres ei matin a mon ièira per las engrunar, e ne’n faguère pas ti poitrassa !! Quò’s lo temps das malurs, quò’s pas possible.
Seriá pas ren encara de ieu, que, mon blat s’eissujarà ben, mè quò’s aquel paure Bolengièr de la Marianna !! Ne’n fai de poitrassas ! Paure bogre, vai ! podiá ben restar Mitron, non pas s’anar far fotre de iel pertot, e far prene vergonha en tota la França ! Çò que lo consola, pareis, coma çò que consola totes los varlets de la Gusa, quò’s que a tota la canalha per lo manténer…
Autre malur : pareis que lo mèma jorn, dimècres, lo papà Grévy, parlent per respèct, anava a la chaça das caions sauvatges, qu’apèlon los senglars. Sos vesins n’èron ben un pauc estonats, parça que, son acostumats a lo veire cruèl ren que còntra los paures lapins, mè anfèn, quò’s pas quí lo malur que vòle dire. Ce que vòle dire es que aiá eibledat de consultar lo matin, un petit libron que de costuma pòrta totjorn eme iel. (Ama tant de legir, surtot sos discors que fasiá l’an passat a la Chambra !!) Aquel libron, que lo quita pas, quò’s (o davinariatz pas !) quò’s « l’Armanhac dei Feçoirièr ! »… Mè, si l’eibledèt, n’aguèt vuna ramada !! Autanben, quand rentrèt vèrs iel, tot raiant de pertot, trempe coma una sopa, sa femna se fachava : « Mè sabiás donc pas qu’anava plòure vuèi ? ço li fasiá ! As Bolengièr ?… Perque portaves pas ton Armanhac, simple !
— Li ai pas pensat ! li ai pas pensat ! respondiá lo vièlh !
— E li as pas pensat ! Ai paur que bienlèu eibledaràs tas braias !! Un autre còp, quand l’eibledaràs, dija-me o, que ieu te li farai pensar !…
— As rason, tè ; t’o dirai, te faches plus e fai-m’un poton, pechaire !…
— A ça, iara, sabes pas ? Pareis que lo Feçoirièr fai encara un autre Armanhac per 87 !
— Quanta chança ! Vai, me banharai plus ! Solament, coma quauqua fes se trompa d’un jorn, quand anonça la pluèia, un autre còp atendrai lo suslendeman, per anar a la chaça.
D’après lo jornal reaccionèra de l’Ardecha, veja aicí çò que serà l’Armanhac de 87. Coma aqueste an, anonçarà lo temps que deu faire, a tot azard. Dirà as feçoirièrs lo travalh que devon faire.
Donarà quauquas flors dei paradís ; de recèptas utilas. Los chaçaires li trobaràn encara quauqua fotralha, mè coma ieu aqueste an, li ai pas mandat tot ce que m’es arribat vèrs Vaudrey, li aurà de pas fòrça escarabilhadas. Li aurà quauquas unas de las cronicas de l’annada. Li aurà de bòns conselhs de politica, e mila autras besonhetas… Sans contar puèisses un pauc de tot, frimossadas, farças, istoaras, sornetas, provèrbes, que sabe ieu.
Anfèn, lo papièr serà pas tant mince, e serà tot cordurat, per que los fuèus s’embòlhon pas.
Per lo prix, costarà coma l’Almanach du Pèlerin.
Vun, costarà 10 sòus ;
Se’n bailarà 7 per 6 prix 3 fr.
» » 15 » 12 » 6 »
» » 75 » 50 » 25 »
» » 150 » 100 » 50 »
» » 350 » 200 » 100 »
Las anonças se fan paiar coma l’an passat.
Lo Feçoirièr.
Le Patriote du dimanche | 15 08 1886
Denis Capian, 2011
occitan.org